Policia nis hetimet pas sulmit ndaj gazetarit Bledi Mane

Policia e Shtetit ka reaguar zyrtarisht lidhur me incidentin e ndodhur më 5 tetor në Tiranë, ku gazetari Bledi Mane u sulmua me vezë nga një grup protestuesish gjatë zhvillimit të një proteste. Sipas njoftimit zyrtar, strukturat policore po kryejnë të gjitha veprimet procedurale për sqarimin e plotë të rrethanave, identifikimin e personave të përfshirë në këtë akt dhe referimin e çështjes pranë organit të Prokurorisë, në përputhje me ligjin. Në deklaratën e saj, Policia e Shtetit dënon çdo formë të dhunës, kanosjes apo intimidimit. Institucioni thekson se ndonëse e drejta për protestë paqësore garantohet nga Kushtetuta, kjo nuk mund të shërbejë si mjet për të kërcënuar apo shënjestruar qytetarë të tjerë për shkak të mendimeve dhe bindjeve të tyre. “Askush nuk mund të marrë ligjin në duart e veta, të vendosë se kush duhet ndëshkuar dhe ta zbatojë këtë vendim në rrugë. Zbatimi i ligjit është përgjegjësi ekskluzive e institucioneve të shtetit”, thuhet në njoftim. Autoritetet u kanë bërë thirrje qytetarëve që të shmangin konfrontimet dhe të mos i përgjigjen dhunës me dhunë. Policia nënvizon se çdo person që ndihet i kërcënuar apo i kanosur duhet t’u drejtohet strukturave të policisë, duke garantuar se çdo kallëzim do të trajtohet me seriozitet. Policia e Shtetit deklaron se do të garantojë mbrojtje të barabartë për të gjithë qytetarët, duke theksuar se liria e protestës dhe e shprehjes mbrohen nga ligji pa asnjë dallim.