Forcat e policisë në Shkodër kanë parandaluar një atentat që kishte në shënjestër Preng Gjinin, i cili më parë i ka mbijetuar një shpërthimi me eksploziv në shtator të vitit 2020 në zonën e Selitës në Tiranë.
I arrestuari, Euglen Buraku nga Durrësi, u ndalua në fshatin Stajkë të Vaut të Dejës, ndërsa qarkullonte me një automjet që mbante targa të mbivendosura. Gjatë kontrollit, atij iu gjet një sasi lënde plasëse e lidhur me një aparat celular, i cili shërbente si mekanizëm për shpërthim në distancë. Ekspertimi i telefonit të tij zbuloi një fotografi të Preng Gjinit, e cila konsiderohet si provë për qëllimin e sulmit.
Në lidhje me këtë ngjarje, hetuesit kanë identifikuar si bashkëpunëtor të dyshuar Eduard Përgjokën, 34 vjeç, i cili është shpallur në kërkim. Gjatë kontrollit të ushtruar në banesën e tij në Rubik, policia sekuestroi 11 celularë, kapsolla detonatore dhe fara të bimës narkotike kanabis.
Ndaj dy personave të përfshirë ka nisur hetimi për veprat penale të vrasjes me paramendim të mbetur në tentativë, armëmbajtjes pa leje, si dhe prodhimit dhe shitjes së lëndëve narkotike. Sipas të dhënave nga dosja hetimore “REVANSHI” e Prokurorisë së Posaçme (SPAK), atentati i parë ndaj Preng Gjinit dyshohet se u krye për motive gjakmarrjeje. Për atë ngjarje, autoritetet kanë marrë nën akuzë gjashtë persona, të cilët akuzohen si urdhërues apo sigurues të mjeteve për kryerjen e vrasjes.
Përditësime
I arrestuari Euglen Buraku ka implikuar Eduard Përgjokën si pronar të lëndës plasëse të sekuestruar gjatë operacionit për parandalimin e atentatit ndaj Preng Gjinit. Buraku ka dhënë dëshmi kontradiktore, duke tentuar fillimisht të fshehë lidhjet familjare me objektivin e sulmit. Gjatë këqyrjes së celularit të tij, hetuesit gjetën fotografinë e një biznesmeni ndërtimi, për të cilin i arrestuari pretendon se nuk ka dijeni. Sipas hetimeve, Preng Gjini kishte hyrë në Shqipëri pak ditë më parë dhe dyshohet se mbahej nën vëzhgim. Ngjarja ndërlidhet me konfliktet e vazhdueshme mes familjeve Gjini dhe Reçi.