Strukturat e Policisë së Tiranës kanë nisur procedimin penal në gjendje të lirë ndaj nëntë personave, të cilët pas përfundimit të protestës së datës 20 qershor 2026, kanë vijuar të qëndrojnë në bulevardin “Dëshmorët e Kombit”. Sipas njoftimit zyrtar, tubimi kishte përfunduar rreth orës 22:00, por personat në fjalë kanë vijuar qëndrimin në hapësirën publike, duke bllokuar qarkullimin e automjeteve.
Sipas policisë, protestuesit kanë zaptuar bulevardin duke vendosur karrige metalike dhe sende të tjera, ndërsa kanë refuzuar thirrjet e përsëritura të efektivëve për t'u larguar dhe për të respektuar dispozitat ligjore. Personat e proceduar janë: Sh. G. (32 vjeç), A. G. (56 vjeç), A. B. (25 vjeç), V. K. (28 vjeç), G. K. (30 vjeçe), A. K. (43 vjeç), E. S. (36 vjeç), A. K. (34 vjeç) dhe R. Sh. (22 vjeç).
Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë. Ata akuzohen për këto vepra penale:
- "Pengimi i qarkullimit të mjeteve të transportit"
- "Prishja e qetësisë publike"
- "Organizimi dhe pjesëmarrja në grumbullime të paligjshme"
Policia ka bërë të ditur se vijon puna për identifikimin e personave të tjerë të përfshirë në veprime të ngjashme gjatë tubimit. Çdo i proceduar prezumohet i pafajshëm deri në një vendim përfundimtar të gjykatës.