Ambasada e Shteteve të Bashkuara në Tiranë ka njoftuar për rrezik të mundshëm të sulmeve nga elementë të lidhur me Iranin kundër subjekteve të lidhura me SHBA ose anëtarëve të opozitës iraniane në Shqipëri. Një ditë më parë, ajo paralajmëroi se në shënjestër mund të jenë vende turistike, qendra tregtare, hotele, klube dhe restorante.
Në kampin Ashraf 3 në Manzë, ku jetojnë rreth 2500-2700 anëtarë të opozitës iraniane të vendosur që nga viti 2018, situata paraqitet e qetë. Përfaqësuesit e kampit kanë thënë se nuk ndihen të rrezikuar. Autoritetet kryejnë kontrolle të herëpashershme, me agjentë të Antiterrorit të pranishëm të enjten dhe patrullime çdo 30 minuta nga Policia e Durrësit.
E njëjta gjendje qetësie vërehet pranë Ambasadës Amerikane në Tiranë, ku agjentë civilë të policisë kriminale kryejnë verifikime të shpeshta. Vëmendje e shtuar është edhe te Ambasada e Izraelit dhe seli të tjera diplomatike.
Policia ka rritur vigjilencën në Aeroportin e Rinasit, pikat doganore dhe sheshet kryesore. Burime pranë Policisë së Shtetit thanë se kampi ka pasur që në fillim plan masash sigurie, por tani vigjilenca është shtuar, pa të dhëna për rrezik konkret.