Policia Rrugore vendos 21 931 masa administrative në një javë

Drejtoria e Policisë Rrugore ka intensifikuar masat për rritjen e sigurisë rrugore në të gjithë vendin, në zbatim të porosive të Drejtorit të Përgjithshëm të Policisë së Shtetit. Kontrollet janë zhvilluar në akset rrugore nacionale dhe zonat urbane, duke përdorur mjete inteligjente për matjen e shpejtësisë dhe dronë për monitorimin e trafikut.

Shkeljet e verifikuara përfshijnë drejtimin e automjetit në efektin e alkoolit apo në gjendje të dehur, përdorimin e telefonit celular gjatë drejtimit, mosvendosjen e rripit të sigurimit ose të kaskës mbrojtëse, parkimet e gabuara, parakalimet e gabuara, zhurmat nga marmitat, mosdhënien e përparësisë këmbësorëve në vijat e bardha si dhe manovrat e rrezikshme.

Si rezultat i këtyre kontrolleve gjatë një jave:

• 21 931 masa administrative në total;
• Arrestuar 36 drejtues automjetesh, 22 për drejtim në gjendje të dehur dhe 14 pa leje drejtimi;
• 11 526 masa për parkime të gabuara në zonat urbane, ku në dhjetëra raste u përdorën mjetet ngritëse për të hequr automjetet nga korsitë e dedikuara dhe trotuaret;
• 4 775 masa për shpejtësi tej normave të lejuara në akset rrugore nacionale;
• 1 224 masa për mosvendosje të kaskës mbrojtëse;
• 302 masa për mosvendosje të rripit të sigurimit;
• 789 masa për përdorim të celularit gjatë drejtimit;
• 1 235 masa për parakalime të gabuara;
• 83 masa për drejtim në efektin e alkoolit ose në gjendje të dehur;
• 139 masa për zhurma dhe manovra të rrezikshme;
• 1 858 masa për shkelje të tjera.

Masat do të vazhdojnë edhe gjatë fundjavës, veçanërisht në akset drejt zonave bregdetare dhe turistike, për të parandaluar drejtimin nën efektin e alkoolit.