Një operacion i Policisë së Kosovës, i zhvilluar të hënën rreth orës 17:40, ka rezultuar me gjetjen dhe sekuestrimin e një sasie të konsiderueshme armësh dhe lëndësh narkotike në Kaçanik. Gjatë kontrollit në shtëpinë e një të dyshuari në rrugën "Skënderbeu", efektivët gjetën 401.9 gramë substancë të dyshuar narkotike të llojit marihuanë.
Në cilësinë e provës materiale, përveç narkotikëve, u konfiskuan edhe:
• Një armë zjarri e tipit AK-47 me pesë karikatorë dhe 109 fishekë.
• Një pistoletë me dy karikatorë dhe 29 fishekë.
• Shuma prej 9.050 euro para të gatshme.
Sipas njoftimit zyrtar, rasti është iniciuar për veprat penale "Posedim i paautorizuar i narkotikëve, substancave psikotrope dhe analoge" dhe "Mbajtje në pronësi, kontroll ose posedim të paautorizuar të armës". Aktualisht, hetimet janë duke vijuar, ndërsa nuk raportohet për persona të arrestuar në lidhje me këtë rast.