Ministri i Punëve të Brendshme, Besfort Lamallari, ka reaguar në lidhje me aksionin e Policisë Rrugore për evidentimin dhe heqjen e xhamave të errësuar në automjete, të cilët janë vendosur në kundërshtim me ligjin. Nëpërmjet një njoftimi në rrjetet sociale, ministri u shpreh se automjetet me xhama të errësuar pa lejen përkatëse nuk do të tolerohen.
Sipas Lamallarit, rrugët publike kërkojnë siguri dhe transparencë, ndaj mbajtja e xhamave të errësuar pa autorizim është një shkelje që do të trajtohet konform ligjit. Ai nënvizoi se rregullat për sigurinë rrugore vlejnë për çdo qytetar, pa asnjë privilegj.
"Xhamat e errësuar në makinë nuk ju bëjnë të padukshëm. Dhe më keq akoma kur ato i keni pa leje, sigurisht që do të hiqen pa një pa dy nga Policia e Shtetit", deklaroi ministri.
Aktualisht, Policia Rrugore po vijon kontrollet në të gjithë territorin e vendit, në kuadër të masave për rritjen e sigurisë rrugore. Statistikat zyrtare konfirmojnë se gjatë dy javëve të fundit janë ndëshkuar më shumë se 500 drejtues mjetesh që kanë qenë në shkelje të këtij rregulli.