Policia spanjolle zhvilloi një operacion të gjerë antidrogë në provincën e Korunjës, ku u sekuestruan 1.410 kilogramë kokainë dhe u arrestuan tre persona. Në hetim, i cili nisi më 20 gusht pas informacioneve për mbërritjen e drogës nga deti, mori pjesë edhe Administrata Amerikane për Zbatimin e Ligjit kundër Drogave (DEA).
Sipas hetimeve, ngarkesa u transportua fillimisht me dy mjete lundruese drejt plazhit në A Pobra do Caramiñal. Banda e njohur si Fanchos dyshohet se ishte përgjegjëse për shkarkimin dhe fshehjen e përkohshme të lëndës narkotike. Policia vëzhgoi lëvizjet e të dyshuarve për disa ditë, duke përfshirë masa të shtuara sigurie të marra nga ana e tyre për të shmangur mbikëqyrjen.
Në orët e para të 22 gushtit, autoritetet ndërhynë kur panë kreun e bandës dhe dy bashkëpunëtorët e tij duke zhvendosur pako të rënda nga një magazinë/hambar drejt një banese tjetër në afërsi të plazhit O Conchido. Pas ndërhyrjes, përveç sasisë së madhe të kokainës, policia gjeti edhe 100 gramë heroinë, para të gatshme dhe sende të tjera që janë dërguar për ekspertizë.
Tre të arrestuarit akuzohen për pjesëmarrje në organizatë kriminale dhe trafikim të lëndëve narkotike, ndërsa pritet dalja e tyre para autoriteteve gjyqësore spanjolle.