Policia e Tiranës ka reaguar pas raportimeve për dhunimin e disa turistëve italianë në qendër të kryeqytetit. Ngjarja ka ndodhur rreth orës 22:00, më datë 29 korrik 2026, në zonën pas Pallatit të Kulturës. Shërbimet e Komisariatit të Policisë Nr. 1, pas marrjes së njoftimit nga Salla Operative, kanë mbërritur në vendngjarje ku kanë konstatuar shtetasin italian me inicialet G. M., i cili kishte pësuar dëmtime të lehta sipërfaqësore. Në atë moment, ai shoqërohej nga dy persona të tjerë.
Sipas raportimit zyrtar, ndihma e parë për italianin u ofrua fillimisht nga punonjës të Policisë Bashkiake që ndodheshin në afërsi, përpara se ai të dërgohej në spital për trajtim mjekësor. Personeli mjekësor konfirmoi se i dëmtuari ishte i vetëdijshëm dhe jashtë rrezikut për jetën, me dëmtime të lehta në gjymtyrë. Pas mjekimit, turisti është larguar me dëshirën e tij nga ambientet spitalore pa përfunduar ekzaminimet dhe pa njoftuar stafin.
Policia theksoi se as shtetasi italian dhe as dy personat që e shoqëronin nuk kanë pranuar të bëjnë kallëzim penal në lidhje me konfliktin apo personat që e kishin dëmtuar. Pavarësisht mungesës së kallëzimit, grupi hetimor ka nisur verifikimet për veprën penale “Plagosja e lehtë me dashje”. Nga këqyrja e pamjeve filmike të siguruara nga zona, ka rezultuar se turisti ishte përfshirë në një konflikt me një grup të miturish. Autoritetet vijojnë veprimet hetimore për të zbardhur plotësisht rrethanat e rastit dhe për të identifikuar personat e përfshirë.
Përditësime
Më 1 gusht, Policia e Shtetit publikoi njoftimin zyrtar lidhur me incidentin ku u përfshinë turistë italianë në Tiranë. Autoritetet konfirmuan se dy personat që shoqëronin italianin kanë refuzuar të dëshmojnë mbi rrethanat e konfliktit. Ndërkohë, media italiane raportojnë se të dyshuarit janë adoleshentë shqiptarë, pistë e cila mbetet në qendër të hetimeve.