Benjamin Netanyahu, kryeministri izraelit, ka qenë forcë shtytëse pas veprimeve ushtarake dhe sabotazhit kundër programit bërthamor të Iranit dhe qeverisë së tij klerikale. Pas vdekjes së Udhëheqësit Suprem Ajatollah Ali Khamenei, ai është pranë realizimit të ambicies për neutralizimin e kërcënimit iranian, sipas një analize të Politico-s të publikuar më 2 mars 2026.
Të shtunën në mbrëmje, Netanyahu u bëri thirrje qytetarëve iranianë të "çlirohen nga tirania", duke e cilësuar si "mundësi që vjen një herë në një brez" për të rrëzuar diktaturën. Ai i ftoi ata të "dalin masivisht në rrugë" dhe të "përfundojnë punën". Në të njëjtën linjë, presidenti amerikan Donald Trump këmbënguli se iranianët kanë "mundësinë më të madhe" për të rimarrë vendin.
Plani izraelit për "ditën pas" lë shumë në dorë të fatit dhe guximit të miliona iranianëve. Nga Tabrizi në Zahedan, qytetarët pritet të përmbysin aparatin e sigurisë së regjimit përmes protestave masive, pa ide të qartë për qeverinë e ardhshme. Politico shkruan se Netanyahu del fitues edhe nëse kryengritja shkakton kaos të dhunshëm, pasi një Iran i dobët nuk mund të zhvillojë armët bërthamore apo të financojë milicitë aleate.
Shembuj nga rajoni
Ky qasje shihet në Liban, ku Netanyahu nuk ka ndihmuar autoritetet për të disiplinuar ose çarmatuar Hezbollah-un, por ka vazhduar sulmet ajrore dhe me dronë. Në Siri, ai ka ushtruar presion ndaj udhëheqjes së re në Damask duke mbështetur pakicën druze. Në territoret palestineze, akuzohet për shfrytëzimin e përçarjeve mes Hamasit dhe Autoritetit Palestinez.
Logjika, sipas analizës, është se përçarjet e brendshme apo lufta civile pengojnë këto vende të kthehen kundër Izraelit. Paqëndrueshmëria shërben interesave izraelite nëse dobëson kapacitetet e armikut.