Autoritetet e sigurisë në Poloni kanë ndërmarrë masa urgjente pas marrjes së informacioneve për një sulm të mundshëm ndaj kryeministrit Donald Tusk dhe zëvendëskryeministrit njëherësh ministrit të Mbrojtjes, Władysław Kosiniak-Kamysz. Lajmi u konfirmua nga zëdhënësja e Ministrisë së Brendshme, Karolina Gałecka, e cila bëri të ditur se ministri i Brendshëm, Marcin Kierwiński, dhe koordinatori i Shërbimeve Speciale, Tomasz Siemoniak, kanë urdhëruar nisjen e menjëhershme të veprimeve hetimore.
Në përgjigje të kërcënimit, më 11 tetor në orën 11:00, u zhvillua një mbledhje urgjente në Qendrën Kundër Terrorizmit të Agjencisë së Sigurisë së Brendshme (ABW). Në këtë takim morën pjesë përfaqësues të policisë kombëtare, Shërbimit Shtetëror të Mbrojtjes (SOP) dhe ABW-së për të vlerësuar shkallën e rrezikut. Zëdhënësi i shërbimeve speciale, Jacek Dobrzyński, deklaroi se institucionet po e trajtojnë çështjen me seriozitet maksimal, duke vlerësuar se ekziston një probabilitet i lartë që kërcënimet të mund të realizohen.
Sipas zëdhënësit të qeverisë, Adam Szlapka, kryeministri Donald Tusk është informuar për situatën mëngjesin e së dielës dhe vijon normalisht detyrat e tij zyrtare në Varshavë. Autoritetet nuk kanë publikuar ende detaje mbi natyrën e kërcënimit, ndërsa disa burime, si Radio Zet, raportuan se informacioni mund të ketë mbërritur përmes një njoftimi elektronik.
Ky zhvillim vjen në një klimë të tensionuar sigurie, të ndikuar nga lufta në Ukrainë dhe rreziku i sulmeve hibride, për të cilat Tusk kishte paralajmëruar gjatë shtatorit. Gjithashtu, vendi është përballur së fundmi me episode dhune në shkolla dhe arrestime për sabotim. Kërcënimet ndaj politikanëve nuk janë të panjohura për autoritetet polake, të cilat në muajin gusht ndaluan një 23-vjeçar për nxitje të vrasjes së zyrtarëve të lartë.