Shfaqja satirë-kabare '24 orë nga jeta e një votuesi', nën regjinë e Driada Dervishit, ka pasur premierën në Teatrin Kombëtar të Tiranës. Vepra ndërthur komedinë, muzikën dhe ironinë për të pasqyruar jetën e një votuesi shqiptar gjatë 24 orëve, duke simbolizuar rreth 35 vite të realitetit shoqëror.
Regjisorja Driada Dervishi shpjegon se shfaqja vjen si një "24-orësh sprint, por ku përfshihen ndoshta 35 vite". Ajo thekson se "është një ditë që përngjan me shumë ditë të bashkëqytetarëve tanë", ndërsa gjuha është e ndikuar nga teatri satirik kabare, i mbështetur në personazhe provokues. Dervishi dëshiron që publiku të shohë "gabimet e së përditshmes edhe te vetja".
Në role kryesore luajnë aktorët Arben Derhemi, Zamira Kita, Xhuliano Brisku dhe Ermir Hoxhaj. Arben Derhemi interpreton një personazh të ri për të, ku një batutë thotë se "ti ke lindur gabim", dhe në fund personazhi e kupton arsyen. Ai e përshkruan veprën si "realiteti shqiptar, i përkthyer në teatër. Një realitet i hidhur dhe grotesk", që do të bëjë njerëzit të qeshin, të qajnë dhe të reflektojnë me autoironi.
Zamira Kita luan një grua korçare, rol që i përshtatet natyrshëm. Ajo thotë se "humori ynë është i këndshëm, do të qeshin, do të kënaqen dhe do t’i vënë gishtin kokës". Ermir Hoxhaj shton se shfaqja përmban "të gjitha bisedat që ne bëjmë në kafe, raporti që kemi si popull me pushtetin".
Vepra bazohet në motive të Naun Shundit dhe teksin 'E të tjera, e të tjera' të Teodor Kekos, muzikuar nga Aulon Naçi, me bandën e Gent Rrushit. Keko ka shkruar poemën satirike në vitin 1996, e cila shërben si refren kryesor dhe nxjerr në pah se ndryshimet në Shqipëri janë më të pakta nga sa mendohet.
Publiku ka mbushur sallën dhe e ka mirëpritur shfaqjen, e cila vazhdon deri më 18 janar, çdo mbrëmje në orën 20:00 në Teatrin Kombëtar pranë ArTurbinës.