Zyra e Presidentes së Republikës së Kosovës ka bërë publike pasqyrën e shpenzimeve zyrtare për tremujorin e dytë të vitit 2026. Sipas të dhënave, aktiviteti i ushtrueses së detyrës së Presidentes, Albulena Haxhiu, së bashku me kabinetin e saj, ka gjeneruar kosto prej 12,421.39 euro.
Sipas njoftimit zyrtar, kjo shumë mbulon periudhën nga 4 prilli 2026, kur Haxhiu mori detyrën, deri më 30 qershor 2026. Institucioni ka sqaruar se ky publikim është ndërmarrë me qëllim të transparencës dhe informimit të saktë të publikut, për të shmangur paqartësitë mbi raportimin e të dhënave financiare.
Presidenca u ka bërë thirrje mediave dhe palëve të interesuara që për çdo kërkesë për sqarime të mëtejshme t'i drejtohen institucionit përmes rrugëve zyrtare, duke theksuar se komunikimi i drejtpërdrejtë kontribuon në një raportim objektiv dhe parandalon keqinterpretimet që mund të burojnë nga nxjerrja e të dhënave jashtë kontekstit.
Sipas të dhënave të institucionit, shpenzimet totale të Zyrës së Presidentes për gjysmën e parë të vitit 2026, periudhë që përfshin edhe mandatin e ish-presidentes Vjosa Osmani, kanë arritur në 203,133 euro.