Presidenti i Republikës, Bajram Begaj, mori pjesë në ceremoninë e 70-vjetorit të shugurimit meshtarak të Kardinal Ernest Simoni, të zhvilluar në katedralen Santa Maria del Fiore në Firence më 4 maj.
Gjatë mesazhit të tij, Presidenti Begaj vlerësoi figurën e Kardinal Simonit si simbol të qëndresës, besimit dhe sakrificës, duke e quajtur atë martir i gjallë. "Historia Juaj është dëshmi e gjallë se asnjë regjim nuk mund të shfarosë besimin dhe dinjitetin njerëzor. Historia Juaj, Kardinal Ernest Simoni, na mëson se besimi nuk matet në kohë të qeta, por në kohë sprove dhe se dinjiteti i njeriut nuk varet nga rrethanat, por nga qëndrimi që ai mban përballë tyre", u shpreh ai.
Presidenti nderon sakrificën e klerikëve gjatë diktaturës dhe të 38 martirëve katolikë të lumturuar. Ai theksoi se falë kësaj sakrifice dhe përkushtimit, Shqipëria sot është model i bashkëjetesës fetare. "Kjo harmoni ndërfetare është përgjegjësi e përditshme dhe pasuri që duhet ta ruajmë, ta kultivojmë dhe ta përcjellim me krenari te brezat e ardhshëm. Por kjo liri nuk erdhi vetë. Ajo ka emra, ka histori, ka sakrifica. Dhe një nga këta emra është pa dyshim Kardinali Ernest Simoni", deklaroi ai.
Një mesazh të veçantë nderimi Presidenti Begaj dërgoi për Papa Françeskun, i cili e lartësoi figurën e Simonit dhe ia tregoi botës këtë martir të gjallë që kapërceu vuajtjet e diktaturës pa urrejtje, pa hakmarrje dhe me përulësi. "Vendimi për ta ngritur në dinjitetin e Kardinalit ishte një akt i thellë mirënjohjeje dhe vlerësimi jo vetëm për një njeri, por për një histori, dëshmi e gjallë qëndrese, shprese, besimi dhe dinjiteti njerëzor", theksoi Presidenti.
Ai shtoi se në momente si ky, ku historia, besimi dhe njeriu takohen, kujtojmë se madhështia nuk qëndron te fuqia apo fama, por te përulësia. "Zakoni shqiptar na mëson se njeriu bëhet i madh jo kur merr, por kur jep."