Kryeministri në detyrë, Albin Kurti, ka marrë pjesë në një takim konsultativ të organizuar nga Instituti për Krimet e Kryera Gjatë Luftës në Kosovë, ku është diskutuar versioni fillestar i listës preliminare të viktimave të luftës së fundit në vend. Takimi, i zhvilluar 27 vjet pas përfundimit të luftës, shërbeu për shqyrtimin e plotësimeve të nevojshme të kësaj liste.
Në fjalën e tij, Kurti theksoi se dokumentimi i krimeve të luftës dhe ndërtimi i një evidence shtetërore të besueshme është detyrë që ndërlidhet me kujtesën, drejtësinë dhe dinjitetin e viktimave. Sipas tij, lista është fryt i një procesi më shumë se dyvjeçar të mbledhjes, krahasimit dhe verifikimit të të dhënave.
"Secili emër në këtë listë përfaqëson një jetë të humbur, një familje të goditur dhe një pjesë të historisë sonë. Prandaj, çdo e dhënë duhet të trajtohet me kujdes", u shpreh Kurti.
Në takim morën pjesë përfaqësues të institucioneve relevante, përfshirë Akademinë e Shkencave dhe Arteve të Kosovës, Universitetin e Prishtinës, si dhe ekspertë e përfaqësues të organizatave të ndryshme.
Kurti ritheksoi nevojën që Serbia të hapë arkivat e saj për krimet e kryera, duke vlerësuar se Instituti për Krimet e Kryera Gjatë Luftës, i themeluar në nëntor të vitit 2023, ka për detyrë institucionalizimin e kësaj trashëgimie historike dhe zbardhjen e plotë të së vërtetës.
Përditësime
Eksperti ligjor Blerim Burjani ka kritikuar vonesat në finalizimin e listës së viktimave të luftës, duke vlerësuar se neglizhenca institucionale dhe kalkulimet politike janë shkaktarët kryesorë të kësaj zvarritjeje. Sipas tij, kompletimi i kësaj liste është parakusht i domosdoshëm për krijimin e bazës ligjore, e cila do t'i mundësonte Kosovës ngritjen e padive për gjenocid ndaj Serbisë.