Pas vrasjes së 20-vjeçarit portugez Luis Miguel Varela Mendes në një beach-bar në Ksamil, kompleksi i njohur bregdetar Principote Mykonos në Greqi ka bërë një sqarim zyrtar. Në deklaratën e saj, kompania greke mohon kategorikisht çdo marrëdhënie biznesi apo bashkëpunimi me lokalin në Shqipëri ku ndodhi incidenti i rëndë.
Sipas përfaqësuesve të Principote Mykonos, biznesi në Ksamil po përdor ilegalisht markën e tyre të regjistruar për të përfituar nga reputacioni ndërkombëtar i kompanisë. Për shkak të kësaj shkeljeje, kompania ka konfirmuar se ka ndërmarrë procedura ligjore ndaj subjektit shqiptar, me qëllim ndalimin e përdorimit të emrit dhe shmangien e konkurrencës së padrejtë.
Në reagimin zyrtar, kompania thekson: “Në dritën e një incidenti tragjik që ndodhi së fundmi në qytetin shqiptar të Ksamilit dhe në një dyqan që po përdor ilegalisht emrin tonë të biznesit, sqarojmë, për të shmangur konfuzionin, se PRINCIPOTE MYKONOS nuk ka absolutisht asnjë marrëdhënie biznesi apo tjetër me lokalin e mësipërm shqiptar”.
Reagimi i markës ndërkombëtare pason hetimet që po zhvillojnë autoritetet shqiptare për vrasjen e 20-vjeçarit portugez. Për këtë ngjarje është vënë në pranga 29-vjeçari Sokrat Vata, i cili dyshohet si autor i vrasjes së ndodhur në mjediset e lokalit të përmendur.