Prishtina e Re arriti fitore të rëndësishme 2-1 ndaj Malishevës, në ndeshjen e xhiros së 28-të të Superligës së Kosovës në futboll. Ndeshja u zhvillua të shtunën në fushën me bar sintetik të Kampit Nacional të Federatës së Futbollit të Kosovës në Hajvali.
Pjesa e parë përfundoi pa gola, pas disa rastesh nga të dyja skuadrat. Në minutën 59, Etnik Brruti kaloi Malishevën në epërsi me 1-0.
Nikoqirët reaguan në fraksionin e dytë. Ibrahim Kargbo barazoi në minutën 78, ndërsa Endrit Baholli realizoi golin e fitores në minutën 89, duke siguruar tre pikët për Prishtinën e Re.
Me këtë rezultat, Prishtina e Re mbledh 27 pikë dhe mbetet në vendin e fundit të tabelës. Malisheva humbi për herë të dytë radhazi dhe renditet në vendin e pestë me 40 pikë.
Gara për mbijetesë në elitë vazhdon e ashpër. Drenica është parafunditare me 29 pikë, ndërsa Llapi dhe Ferizaj kanë nga 32 pikë në vendet e shtatë dhe tetë, me nga një ndeshje më pak të luajtur.