Policia e Gjirokastrës nisi procedim penal ndaj shtetasit E. K., 33 vjeç, banues në Gjirokastër, për veprën penale "Përhapja e informatave të rreme që ngjallin panik". Ai dyshohet se ka publikuar në rrjetet sociale pretendime të pavërteta se kryetari i bashkisë dhe punonjës të saj janë infektuar me HIV/AIDS, çka ka shkaktuar panik te qytetarët.
Specialistët për Hetimin e Krimeve në Komisariatin e Policisë Gjirokastër referuan materialet në Prokurori. Në cilësinë e provës materiale u sekuestrua celulari i 33-vjeçarit. Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme.
Sipas burimeve, personi i proceduar është Emin Kokalari. Avokati i kryebashkiakut Arben Llangozi depozitoi kallëzim penal në Drejtorinë Vendore të Policisë, duke i cilësuar pretendimet si shpifje që dëmtojnë imazhin e personave të përfshirë.
Policia apelon për përgjegjësi në publikimin e informacionit në rrjetet sociale, duke theksuar se përhapja e lajmeve të rreme që cenojnë sigurinë dhe rendin publik përbën vepër penale.