Kompozitori Adrian Hila po hetohet në gjendje të lirë nga Policia e Tiranës për veprën penale “Ndërhyrja e padrejtë në jetën private”, pas shpërndarjes në internet të videove intime të regjistruara brenda ambienteve të studios së tij. Ndërkohë, autoritetet po vijojnë hetimet për identifikimin e personave përgjegjës për publikimin e pamjeve, duke shqyrtuar gjithashtu vepra penale si “Përgjimi i paligjshëm i të dhënave kompjuterike”, “Ndërhyrja në të dhënat kompjuterike” dhe “Keqpërdorimi i pajisjeve”.
Në deklaratat e tij përpara autoriteteve, Adrian Hila ka sqaruar se kamerat e sigurisë në ambientet e tij ishin instaluar që në vitin 2022. Sipas kompozitorit, këto pajisje funksiononin online për qëllime sigurie, por theksoi se ato nuk dispononin memorie për ruajtjen e pamjeve, duke ngritur dyshime për një ndërhyrje të paligjshme ose hakim të sistemit të tij.
Në kuadër të hetimeve, është marrë në pyetje këngëtarja Eli Fara, e cila ka dëshmuar përpara policisë. Ajo ka kërkuar zyrtarisht nga organet ligjzbatuese identifikimin dhe gjetjen e autorit që ka shpërndarë videot ku ajo shfaqej. Gjithashtu, një tjetër person që shfaqet në pamje ka dëshmuar përpara autoriteteve, duke mos ngritur dyshime drejtpërdrejt ndaj kompozitorit për shpërndarjen e pamjeve, por ka kërkuar zbardhjen e autorëve të vërtetë.
Ndërkohë, në Policinë e Tiranës ka dëshmuar edhe gazetari Elton Tozaj. Ai ka deklaruar se nuk ka gisht në shpërndarjen e këtyre materialeve, duke pohuar se ka bërë vetëm raportimin e ngjarjes pasi videot i kishin mbërritur në adresën e tij elektronike.
Përditësime
Kompozitori Adrian Hila sqaroi funksionimin e kamerave, ndërsa këngëtarja Eli Fara dëshmoi përpara policisë duke kërkuar identifikimin e autorit të shpërndarjes së videove.