Dy prokurorë federalë belgë kërkuan të hënën dënim me burgim të përjetshëm për Franc Gergely, të njohur si Franc Çopja, në Gjykatën e Krimeve të Rënda në Bruksel. Ai u shpall fajtor të premten në mbrëmje për urdhërimin e vrasjes së Ardit Spahiut dhe për udhëheqjen e një organizate kriminale.
Procesi gjyqësor, i nisur gjashtë javë më parë, është zhvendosur në pallatin e drejtësisë Justitia në Haren. Prokurorët kërkuan gjithashtu dërgimin e të pandehurit në gjykatën për zbatimin e dënimeve për një periudhë prej të paktën pesë vitesh. Ata vlerësuan se juria nuk duhet të marrë parasysh rrethana lehtësuese.
Ardit Spahiu, 38 vjeç, u vra më 27 nëntor 2020 në Sint-Jans-Molenbeek. Ai u qëllua me nëntë plumba në shpinë dhe kokë. Sipas aktakuzës, vrasja u përgatit për muaj me radhë dhe Spahiu konsiderohej rival i Franc Gergelyt dhe Mikael Qosjes.
Në paraqitjen përfundimtare, prokurorja Nathalie Franco e përshkroi Gergelyn si “trurin operacional” të komplotit. Ajo theksoi se ai ka një “perceptim strategjik”, është “më manipuluesi dhe më i rrezikshmi nga vëllezërit e tij”, ka “mungesë totale të empatisë”, është “individ jashtëzakonëisht i rrezikshëm” me “mentalitet luftarak dhe kriminal”. Prokurorja shtoi se Gergely kërkohet në Shqipëri për disa vepra penale të rënda, megjithëse nuk ka dënime të mëparshme në Belgjikë.
Cédric Vergauwen, avokati i Gergelyt, kundërshtoi kërkesën. Ai deklaroi se prokurorët kërkojnë “një dënim shembullor” dhe se kjo kalon në fushën e simbolit, jo të ligjit. Franc Çopja, 33 vjeç me shtetësi shqiptare, ndodhet në paraburgim që nga 29 dhjetor 2023, pas ekstradimit nga Emiratet e Bashkuara Arabe.
Përditësime
Mbrojtja e Franc Çopja-s theksoi mungesën e dënimeve penale në Shqipëri, ku ai është vetëm i kërkuar dhe i padijenuar, si dhe kontekstin familjar dhe historik. Avokati deklaroi: „Dënimi duhet të jetë i nevojshëm, jo spektakolar, dhe i përshtatur për individin“.