Prokuroria franceze paraqiti në Gjykatën e Apelit të Parisit një propozim për dënim me shtatë vite burg, 300 mijë euro gjobë dhe heqje të të drejtave për të kandiduar për pesë vite ndaj ish-presidentit Nicolas Sarkozy. Kërkesa lidhet me dyshimet për financim të paligjshëm libian të fushatës së tij presidenciale të vitit 2007 nga regjimi i Muammar Gaddafi. Prokurori i Përgjithshëm Rodolphe Jouy-Birman theksoi se Sarkozy duhet të trajtohet si çdo i pandehur tjetër dhe të ndëshkohet sipas seriozitetit të veprimeve.
Në gjykimin e shkallës së parë, më shtatorin e vitit të kaluar, Sarkozy u shpall fajtor për pjesëmarrje në një organizatë kriminale dhe u dënua me pesë vite burg me kusht, 100 mijë euro gjobë dhe heqje të të drejtave politike për pesë vite, me efekt të menjëhershëm. Ai kaloi rreth 20 ditë në një burg në Paris para se të lirohej në pritje të apelit, duke u bërë ish-kreu i parë i shtetit francez pasluftës që përfundon në qeli.
Gjykata e parë nuk gjeti prova për marrjen efektive të fondeve nga Gaddafi, por vlerësoi se Sarkozy dhe bashkëpunëtorët e tij kishin tentuar të siguronin paratë. Akuzat përfshijnë krijimin e një organizate kriminale, ryshfet, financim të paligjshëm të fushatës dhe përfitim nga përvetësimi i fondeve publike.
Sarkozy, 71 vjeç, mohoi akuzat gjatë apelit, duke deklaruar se "asnjë cent nga Libia nuk ka hyrë në fushatën time dhe nuk kam qenë nën ndikimin e Gaddafit". Avokatët e tij kërkuan shpalljen e pafajësisë. Së bashku me të, po gjykohen 10 të pandehur të tjerë, midis tyre ish-ministrat Claude Guéant, Éric Woerth dhe Brice Hortefeux.
Prokurorët kërkuan dënimin për të gjitha akuzat, duke përsëritur propozimin e njëjtë nga shkalla e parë. Gjyqi i apelit pritet të zgjasë deri në fund të majit, ndërsa vendimi përfundimtar parashikohet më 30 nëntorin.