Prokuroria Themelore Publike në Shkup propozoi zëvendësimin e masës së paraburgimit me arrest shtëpiak dhe konfiskimin e dokumentit të udhëtimit për Artan Grubi, ish-zëvendëskryeministrin e parë dhe të dyshuarin e dytë në rastin "Lotaria Shtetërore", bashkë me pesë persona të tjerë.
Grubi u paraqit vullnetarisht pranë organeve të ndjekjes penale dhe shprehu gatishmërinë për bashkëpunim. Ai u paraqit para prokurorit kompetent për të këqyrur shkresat e lëndës, por për shkak të vëllimit të madh të materialit provues, kjo procedurë do të vazhdojë në ditët në vijim, pas së cilës do t’i jepet mundësia të paraqesë mbrojtjen e tij.
Prokuroria argumenton propozimin me faktin se shumica e provave janë siguruar, Grubi u paraqit vullnetarisht dhe ekzistojnë indikacione për rrezikimin e sigurisë së tij personale në repartin e paraburgimit. Këto indikacione mbështeten nga njoftime të organeve kompetente dhe shtrihen edhe te anëtarët e familjes së tij.
Gjykatësi i procedurës paraprake në Gjykatën Themelore Penale Shkup pranoi propozimin e prokurorisë dhe të mbrojtjes pas deklarimit të Grubit në gjykatë. Ai caktoi masën e arrestit shtëpiak me masa shtesë për sigurimin e pranisë së të dyshuarit në procedurë.