Sot është zhvilluar protesta e 31-të me radhë para godinës së Kryeministrisë, ku mijëra qytetarë kanë kërkuar largimin e kryeministrit Edi Rama dhe të kabinetit qeveritar. Tubimi është karakterizuar nga prania e flamujve kombëtarë dhe pankartave me thirrje politike.
Organizatorët kanë konfirmuar se protestat do të vijojnë derisa të plotësohet kërkesa e tyre kryesore për dorëheqjen e kreut të qeverisë.
Axhenda e protestuesve vijon nesër, në orën 10:00, me një tjetër organizim para institucionit të Prokurorisë së Posaçme Kundër Korrupsionit dhe Krimit të Organizuar (SPAK). Gjatë këtij takimi, përfaqësuesit do të dorëzojnë librin "Albanian Files", në të cilin janë mbledhur firmat e qytetarëve që morën pjesë në tubimin e sotëm.