Protestuesit u mblodhën fillimisht në sheshin “Skënderbej” për të marshuar më pas përgjatë bulevardit “Dëshmorët e Kombit”, ku u ndalën para godinës së Kryeministrisë. Gjatë tubimit, aktivistët artikuluan pakënaqësitë ndaj qeverisë, duke kërkuar dorëheqjen e kryeministrit Edi Rama dhe arrestimin e ish-zv.kryeministres Belinda Balluku.
Aktivistja Sidorela Vatnikaj kritikoi qeverinë për mungesë transparence dhe keqmenaxhim të fondeve publike, duke akuzuar institucionet se nuk kanë buxhet për emergjencat civile, ndërsa vuri në dyshim financimin e koncertit të reperit Kanye West. Një tjetër folës, ish-luftëtari i UÇK-së Meçan Zotaj, e cilësoi dorëheqjen e shefit të Shërbimit Zjarrfikës, Arben Cara, si një akuzë ndaj shtetit, duke theksuar se vendi po përballet me rrezikun e zjarreve pa pajisjet e duhura.
Nga ana tjetër, aktivisti Edison Lika shprehu besimin se në shtator lëvizja qytetare do të intensifikohet, duke paralajmëruar largimin e qeverisë. Përveç kërkesave për dorëheqje, gjatë tubimit u përmendën shqetësime lidhur me projektet investuese në zona si Zvërneci dhe Durrësi, si dhe thirrje për ndryshimin e ligjit zgjedhor. Protestuesit theksuan se po kërkojnë një Shqipëri ku askush nuk qëndron mbi ligjin.
Përditësime
Protesta e 73-të u intensifikua me pjesëmarrjen e përfaqësuesve të diasporës, të cilët akuzuan qeverinë për braktisjen e biznesit dhe arsimit. Një qytetar drejtoi një mesazh të ashpër kryeministrit Edi Rama lidhur me qëndrimet për Kosovën, duke paralajmëruar rezistencë në emër të banorëve të Dibrës. Ndërkohë, një protestuese e moshuar konfirmoi qëndresën e përditshme kundër korrupsionit, duke e cilësuar lëvizjen si të pandalshme.