Aksi rrugor Kakavijë-Janinë do të bllokohet sot, duke filluar nga ora 12:30 me orën greke, në kryqëzimin e fshatit Kallpaq. Bllokimi vjen për shkak të protestës së fermerëve grekë dhe do të zgjasë deri në një njoftim të dytë.
Policia Kufitare Kakavijë bën me dije se informacionin e ka marrë përmes qendrës së përbashkët të shkëmbimit të informacionit nga Policia Kufitare Greke. Gjatë kësaj periudhe, qarkullimi lejohet vetëm për automjetet me emergjenca shëndetësore. Policia kërkon mirëkuptimin e qytetarëve dhe sugjeron planifikimin e udhëtimeve në orare të tjera të ditës për të shmangur vonesat.
Njoftimi zyrtar i Policisë Kufitare Kakavijë thotë: «Ditën e sotme, nga ora 12:30 (me orën greke) deri në një njoftim të dytë, aksi rrugor Kakavijë–Janinë, në kryqëzimin e fshatit Kallpaq, do të jetë i bllokuar për shkak të protestës që do të zhvillojnë fermerët».
Protestat e fermerëve grekë vazhdojnë prej javësh dhe kanë paralizuar akse kombëtare në Greqi. Ato zhvillohen në shenjë pakënaqësie për vonesat në dhënien e subvencioneve të Bashkimit Europian. Fermerët kanë paralajmëruar se do të intensifikojnë veprimet nëse qeveria greke nuk plotëson kërkesat e tyre.
Ky nuk është hera e parë që protesta e fermerëve grekë ndikon në pikën kufitare Kakavijë, duke shkaktuar pengesa në qarkullimin e automjeteve midis Shqipërisë dhe Greqisë.