Protestat kanë shkaktuar dëme në biznese dhe institucione financiare në Tiranë, ndërsa disa banka kanë mbyllur përkohësisht degë dhe kanë kufizuar sasinë e parave në bankomate. Sipas Ministrisë së Ekonomisë, 38 degë bankare dhe 42 bankomate janë dëmtuar në Tiranë dhe në qytete të tjera ku janë zhvilluar protesta.
Në rrugët pranë qendrës së Tiranës, përfshirë bulevardin “Dëshmorët e Kombit”, zonën e Piramidës dhe rrugën “Myslym Shyri”, janë dëmtuar godina bankash dhe biznese private. TV Klan raportoi për zyra të djegura, xhama të thyer dhe mallra të dëmtuara. Zjarri në një biznes pranë Gjykatës së Lartë rrezikoi edhe institucionin, ndërsa u sulmua edhe një operator telefonik aty pranë.
Sipas TV Klan, një pjesë e madhe e bizneseve në rrugën “Myslym Shyri” kanë ndërprerë veprimtarinë dhe kanë larguar mallrat. Në rrugën e Durrësit, bizneset në të dyja anët e rrugës kanë mbyllur qepenat dhe veprimtaria tregtare duket e ndërprerë plotësisht. Në disa biznese janë vendosur mesazhe ku u kërkohet protestuesve të mos i dëmtojnë.
Eksperti i tregjeve financiare Artur Ribaj, duke folur në emisionin “E-Zone”, tha se disa degë bankare janë mbyllur përkohësisht, kryesisht brenda Unazës, dhe se disa bankomate kanë dalë jashtë funksionit. Sipas tij, bankat kanë kufizuar sasinë e parave në bankomate si masë sigurie, pas dëmtimeve dhe tentativave për grabitje. Kjo mund t’u vështirësojë qytetarëve tërheqjen e shumave që u nevojiten.
Ribaj tha se dëmet e deritanishme janë materiale dhe se siguria e parave të qytetarëve nuk është vënë në diskutim. Ai paralajmëroi se dëmtimi i infrastrukturës bankare mund të ketë pasoja për ekonominë, bizneset dhe veprimtarinë e përditshme. Sipas tij, nëse situata përshkallëzohet, mund të ndikohet edhe besimi i qytetarëve dhe të shtohet pasiguria financiare.
Qeveria ka deklaruar se bizneset e dëmtuara do të dëmshpërblehen. Subjektet tregtare mund t’i raportojnë dëmet përmes shërbimit elektronik “Dëmi im” në e-Albania. Ekipe të Drejtorisë së Përgjithshme të Tatimeve po kryejnë verifikime në terren.