Protestat kundër qeverisë në Tiranë shënojnë ditën e 62-të

Protesta qytetare në Tiranë ka shënuar këtë të premte ditën e saj të 62-të radhazi. Dhjetëra qytetarë dhe aktivistë u mblodhën rreth orës 19:00 në Sheshin Skënderbej, për të vijuar më pas me një marshim përgjatë Bulevardit Dëshmorët e Kombit drejt godinës së Kryeministrisë. Kërkesat kryesore të pjesëmarrësve mbeten dorëheqja e kryeministrit Edi Rama, largimi i tij dhe reformimi i sistemit politik në vend.

Gjatë tubimit, vëmendje e veçantë iu kushtua zhvillimeve më të fundit rreth ish-ministrit të Shëndetësisë, Ilir Beqaj. Protestuesit ironizuan përmes pankartave vendimin e GJKKO-së për zëvendësimin e masës së sigurisë ndaj tij nga “arrest me burg” në “arrest shtëpie”. Një pankartë e spikatur shkruante: “I fshiu paratë e shëndetësisë me sterilizim. Tani fshin shtëpinë me regjim! Vjedh në spitale, mbrohet në pallate”.

Mesazhet e tjera të protestuesve përfshinin kërkesa për hetimin e zyrtarëve të lartë, me pankarta ku shkruhej: “Peshku i madh ha të voglin. Po peshkun e madh kush e heton? Të mëdhenjtë nuk janë mbi ligjin. Llogaridhënie për të gjithë! SPAK heton. Qytetarët presin përgjigje”.

Nuk munguan as mesazhet në gjuhën angleze, të cilat ironizonin etiketimet e mëparshme politike dhe kërkonin vëmendje ndërkombëtare. Protestuesit deklaruan se tubimet do të vijojnë edhe në javët në vazhdim, deri në përmbushjen e kërkesave të tyre, të cilat u cilësuan si të panegociueshme. Protesta u shoqërua me fjalime dhe thirrje të shumta kundër qeverisë, ndërsa marshimi pritet të shtrihet edhe në rrugë të tjera të kryeqytetit pas përfundimit të qëndrimit përpara institucionit të Kryeministrisë.