Protestat e paautorizuara të shtunën mbrëma, më 31 tetor, në Cyrih dhe Bazel të Zvicrës përfunduan me përplasje mes demonstruesve dhe policisë. Qindra persona morën pjesë në tubimet me moton “Na ka ardhur në majë të hundës – edhe në Zvicër”, të lidhura me protestat e të rinjve në Francë dhe vende të tjera evropiane.
Në Cyrih, disa qindra demonstrues, një pjesë e të cilëve mbanin maska të Halloween-it, u mblodhën rreth orës 22:30 në rrugën Langstrasse. Gjatë marshimit drejt sheshit Helvetiaplatz, pjesëmarrësit përdorën mjete piroteknike. Disa ngritën barrikada me kontejnerë mbeturinash, biçikleta dhe objekte të tjera, të cilave më pas u vunë flakën.
Policia përdori topa uji për të shpërndarë turmën, ndërsa përplasjet vazhduan edhe në rrugët përreth. Sipas autoriteteve, demonstruesit hodhën gurë, shishe dhe mjete piroteknike drejt forcave të rendit, të cilat reaguan me gaz lotsjellës dhe plumba gome. Gjatë trazirave u dogj një automjet dhe u dëmtuan vitrina të disa dyqaneve, si dhe infrastruktura e transportit publik.
Një patrullë policore, e cila po shkonte t’i ofronte ndihmë një adoleshenti të lënduar rëndë në këmbë në një aksident, u sulmua nga një grup personash. Automjeti policor u dëmtua dhe zyrtarët u detyruan të tërhiqeshin. Situata në Cyrih u qetësua rreth orës 01:30.
Në Bazel, rreth 150 persona morën pjesë në një demonstratë të paautorizuar që nisi rreth orës 21:00. Protestuesit marshuan nëpër qendër të qytetit, kaluan urën Mittlere Rheinbrücke dhe vazhduan drejt lagjes St. Johann. Atje ngritën dhe dogjën barrikada me kontejnerë mbeturinash dhe pengesa metalike. Transporti publik u ndërpre përkohësisht dhe pati pengesa në qarkullimin e automjeteve. Policia ndërhyri, ndërsa zjarrfikësit shuan barrikadat e përfshira nga flakët.
Ditët para protestave, në rrjetet sociale ishin shpërndarë thirrje për mobilizim edhe në Zvicër, përfshirë sloganin gjerman “GenZ regelt”, që nënkupton se Gjenerata Z po merr iniciativën. Autoritetet zvicerane kanë nisur hetime për incidentet dhe dëmet materiale.