Platforma "Liria ka Emër" ka njoftuar mbajtjen e një proteste në kryeqytetin e Kosovës, në mbështetje të ish-drejtuesve të Ushtrisë Çlirimtare të Kosovës (UÇK). Tubimi është planifikuar të fillojë sot, në orën 21:00, në sheshin "Skënderbeu" në Prishtinë.
Nëpërmjet thirrjeve të publikuara në rrjetet sociale, organizatorët kanë ftuar qytetarët që të marrin pjesë në këtë aktivitet, duke theksuar nevojën për t'iu ardhur në ndihmë çlirimtarëve. Mesazhi kryesor i përcjellë nga kjo platformë për qytetarët është: "Sonte në 21:00, dalim në shesh për ata që luftuan për ne. Për lirinë që na e lanë. Për çlirimtarët që sot kanë nevojë për zërin tonë. Mos mungo. Të jemi shumë. Të jemi bashkë".
Kjo protestë organizohet si reagim ndaj vendimit dhe aktgjykimit të Gjykatës Speciale në Hagë ndaj udhëheqësve të ish-UÇK-së.
Përditësime
Protestuesit filluan grumbullimin në sheshin Skënderbeu para orarit të parashikuar, duke shënuar natën e pestë radhazi të tubimeve në mbështetje të ish-krerëve të UÇK-së. Pjesëmarrësit shpalosën një flamur gjigant kombëtar me stemën e UÇK-së, ndërsa vëllimi i lartë i njerëzve ka sjellë bllokimin e qarkullimit në rrugët kryesore të qendrës së Prishtinës. Solidariteti për këtë çështje u shtri edhe përtej kufijve, me protesta mbështetëse të raportuara në Vjenë.