Sot, në qytetin e Zarës në Kroaci, do të zhvillohet protesta e gjashtë radhazi në mbështetje të ish-drejtuesve të Ushtrisë Çlirimtare të Kosovës (UÇK), të cilët po gjykohen në Dhomat e Specializuara në Hagë. Organizimi, i iniciuar nga Organizata e Veteranëve të Luftës së UÇK-së (OVL-UÇK), synon të bashkojë shqiptarët e diasporës dhe komunitetin arbëresh të zonës në kërkesën për lirimin e tyre.
Kryetari i OVL-UÇK-së, Hysni Gucati, bëri të ditur se tubimi fillon në orën 18:00. Kjo protestë pason një sërë organizimesh të ngjashme të zhvilluara në Kosovë, Shqipëri dhe Maqedoni të Veriut që prej fillimit të procesit gjyqësor në vitin 2023.
Ish-presidenti i Kosovës, Hashim Thaçi, ish-kryeparlamentarët Kadri Veseli e Jakup Krasniqi, si dhe ish-deputeti Rexhep Selimi, akuzohen nga Dhomat e Specializuara për krime lufte dhe krime kundër njerëzimit. Të gjithë të akuzuarit i kanë hedhur poshtë këto akuza. Përfaqësuesit e veteranëve shprehën shpresën se vendimi i datës 16 shtator, që pritet të shpallet në orën 10:00, do të shënojë fundin e procesit dhe rikthimin e ish-drejtuesve të UÇK-së në shtëpi.