Për të dielën është planifikuar mbajtja e një aktiviteti paqësor dhe simbolik në kryeqytetin e Sllovenisë, Lubjanë, në mbështetje të ish-drejtuesve të Ushtrisë Çlirimtare të Kosovës (UÇK): Hashim Thaçit, Kadri Veselit, Rexhep Selimit dhe Jakup Krasniqit.
Ky organizim është konceptuar si një protestë në heshtje, përmes së cilës pjesëmarrësit synojnë të kërkojnë drejtësi dhe një proces gjyqësor të drejtë për liderët që aktualisht ndodhen në Hagë. Sipas njoftimit të organizatorëve, tubimi do të zhvillohet me respekt dhe dinjitet.
Si pjesë e aktivitetit, të pranishmit pritet të ndezin drita, duke përfshirë dritat e telefonave, si simbol i shpresës, së vërtetës dhe lirisë. Organizatorët kanë bërë thirrje që mesazhi për liderët të përcillet në mënyrë qytetare dhe paqësore, duke përcjellë mesazhin: “Një dritë për shpresën. Një zë për drejtësinë. Një mesazh për liderët në Hagë: nuk jeni vetëm dhe nuk jeni harruar”.