Këtë të shtunë, dita e 35-të e protestave të vazhdueshme në kryeqytet ka përkuar me 62-vjetorin e lindjes së Kryeministrit Edi Rama. Pjesëmarrësit janë mbledhur në sheshin Skënderbej, ku kanë sjellë torta simbolike me mesazhe drejtuar kreut të qeverisë.
Ndër mesazhet e shkruara në torta, të cilat tërhoqën vëmendjen e të pranishmëve, ishin: "Populli të uron, jep dorëheqjen, merr dhe Saliun me vete" dhe "Torta sot, dorëheqja nesër". Një prej aktivistëve deklaroi gjatë tubimit se kjo pritet të jetë ditëlindja e fundit e Edi Ramës në krye të qeverisë.
Pas grumbullimit në shesh, protestuesit kanë marshuar drejt ndërtesës së Kryeministrisë. Në këtë tubim morën pjesë edhe shtetas shqiptarë nga Diaspora, të cilët mbanin pankarta me slogane si "Mjaft më!", "Rama jepe dorëheqjen" dhe thirrje për masa ligjore ndaj figurave kryesore politike, përfshirë përmendjen e Sali Berishës. Protesta është shoqëruar me brohoritje dhe slogane kundër qeverisë, ndërsa qytetarët shprehën vendosmërinë për vijimin e kërkesave të tyre.