Gjatë protestës së zhvilluar në bulevardin kryesor të Tiranës, pjesëmarrësit kanë kryer një akt simbolik duke rrëzuar një bust që përfaqësonte kryeministrin Edi Rama. Mbi bust ishte vendosur mbishkrimi "Diktatori i fundit", ndërsa protestuesit e rrëzuan atë me litar dhe e shkelën me këmbë, duke e krahasuar veprimin me rrëzimin e bustit të ish-diktatorit Enver Hoxha.
Sipas organizatorëve, ky ishte tubimi më i madh i zhvilluar që nga nisja e lëvizjes qytetare 35 ditë më parë, me pjesëmarrje të gjerë të qytetarëve nga vendi dhe diaspora. Protesta është shoqëruar me thirrje si "Rama në burg, Berisha në burg", "Revolucion", "Shqipëri e re", "Dorëheqje" dhe kërkesa për lirimin e personave të ndaluar gjatë përplasjeve me policinë.
Ky akt pason veprime të tjera simbolike të zhvilluara më herët, përfshirë përdorimin e tortës prej betoni dhe arkivolit simbolik. Lëvizja vijon të mbetet e përqendruar para institucionit të Kryeministrisë.