Hetimet e autoriteteve gjyqësore në lidhje me vilën luksoze në Palasë, e cila u sekuestrua pak ditë më parë, kanë sjellë në dritë prova të reja. Gjatë kontrolleve në kompjuterët e studios së arkitekturës Atelier 4, pronë e vëllezërve Alban dhe Olsi Eftimi, u gjetën preventivë që dëshmojnë pronësinë faktike të ish-zv.kryeministres Belinda Balluku mbi këtë objekt. Sipas gjetjeve, ajo e ka përfituar vilën si ryshfet nga kompania Alko Impex General Construction.
Sipas të dhënave të SPAK, deri në fazën e karabinasë vila ishte financuar nga ish-futbollisti Igli Tare, i cili rezulton si porositësi zyrtar në kontratë. Megjithatë, për punimet e mëtejshme dhe ndërtimin e pishinës, investimi është mbuluar nga Arbër Abazi, administrator i kompanisë Alko Impex. Në dokumentet e gjetura rezulton se kompania e Abazit ka paguar shuma që variojnë nga 288 deri në 410 mijë euro pranë studios Atelier 4 për punimet e vilës, ndonëse nuk kishte lidhje zyrtare me objektin.
Hetimi thekson se punimet e brendshme janë menaxhuar nga Lorela Reçi, partnere e Arbër Abazit dhe lidhje familjare e Belinda Ballukut. Si provë kryesore për të vërtetuar pronësinë e Ballukut, hetuesit kanë nxjerrë në pah dy e-mail-e të dërguara nga arkitekti Alban Eftimi në adresën personale të ish-zv.kryeministres, ku shpjegoheshin detajet e projektit.
Aktualisht, Belinda Balluku po hetohet për akuzat e korrupsionit, pastrimit të parave dhe fshehjes së pasurisë, ndërsa mbetet e pandehur për abuzime me tenderat rrugorë, përfshirë atë për tunelin e Llogarasë. Ndaj saj janë caktuar dy masa sigurie: ndalim për të dalë jashtë vendit dhe pezullim nga çdo funksion publik.
Përditësime
Hetuesit e SPAK kanë identifikuar zyrtarisht pronën si 'Vila 188/1' ose 'Vila 2' në kompleksin Green Coast. Dokumentet e sekuestruara zbulojnë investime luksoze, përfshirë një pishinë 'infinity', sauna dhe banjo turke. Një faturë specifike prej 25 mijë eurosh për pishinën mban shënimin 'PISHINA ARBER ABAZI (DHERMI) + BELINDA'. Menaxhmenti i Green Coast dhe arkitekti Alban Efthimiu refuzuan të komentojnë mbi provat e reja të SPAK.
Gjykata e Posaçme vendosi sekuestron preventive mbi vilën në Green Coast në datën 9 shtator. Hetimet identifikuan Igli Taren si personin në emër të të cilit është regjistruar dokumentacioni i pronësisë. Kreu i grupit parlamentar të Partisë Demokratike, Gazment Bardhi, reagoi ndaj këtij zhvillimi duke kritikuar qëndrimin e SPAK mbi çështjen.