Grupi parlamentar i Partisë Socialiste i ka kërkuar Kryetarit të Kuvendit, Niko Peleshi, dhe Sekretariatit për Procedurat, Votimet dhe Etikën marrjen e masave disiplinore ndaj deputetëve të Partisë Demokratike, Gazment Bardhit dhe Klevis Balliut.
Sipas kërkesës së depozituar më 6 mars 2026, dy deputetët kanë penguar zhvillimin normal të seancës plenare të 5 marsit 2026. Ata akuzohen se kanë ndërprerë fjalën e kryetarit të grupit socialist, kanë thirrur nga salla, kanë bllokuar foltoren dhe kanë përdorur gjuhë të papërshtatshme.
PS pretendon se deputetët e opozitës nuk kanë pritur ndërhyrjen e drejtuesit të seancës, duke shkelur rregulloren e Kuvendit. Pas rifillimit, situata përshkallëzua: Bardhi akuzohet për fjalë fyese e kërcënuese, ndërsa Balliu për sjellje agresive dhe dëmtim të pajisjeve, si mikrofonit dhe sistemit të votimit.
Kërkesat specifike përfshijnë përjashtimin e Bardhit për 10 ditë nga komisionet dhe seancat plenare, si dhe të Balliut për 30 ditë.
Ngjarja buron nga deklarata e Taulant Ballës, kryetarit të grupit të PS-së, ndaj deputetes demokrat Albana Vokshit, ku përmendet numri "0900". Kjo shkaktoi debate të ashpra mes mazhorancës dhe opozitës.
Nga ana tjetër, Partia Demokratike ka kërkuar përjashtimin e Taulant Ballës për 60 ditë, duke e akuzuar për gjuhë fyese, seksiste, diskriminuese dhe ngacmim mbi baza gjinore. Demokratët theksojnë se qëllimi është dënimi i çdo forme diskriminimi në Kuvend.
Sekretariati i Etikës do të mblidhet të hënën për të shqyrtuar kërkesat: në orën 14:00 atë të PS-së dhe në orën 15:00 atë të PD-së.