Paris Saint-Germaini (PSG) po përgatit një ofertë deri në 70 milionë euro për mbrojtësin e Barcelonës, Eric Garcian, një nga objektivat e klubit francez për afatin kalimtar të verës së vitit 2027. Sipas raportimeve të ElDesmarque, PSG-ja synon të bindë Barcelonën të heqë dorë nga futbollisti. Megjithatë, deri tani bëhet fjalë për një ofertë të mundshme dhe jo për një propozim zyrtar të paraqitur te klubi katalanas.
Trajneri i PSG-së, Luis Enrique, e vlerëson Garcian dhe beson se ai mund të bëhet pjesë e projektit të klubit. Enrique e njeh futbollistin nga koha kur drejtonte përfaqësuesen e Spanjës dhe e kishte grumbulluar për Kampionatin Evropian të vitit 2020 dhe Kupën e Botës “Katar 2022”.
Interesi i PSG-së lidhet edhe me aftësinë e Garcias për të luajtur në disa pozicione. Ai mund të aktivizohet si qendërmbrojtës, mbrojtës i djathtë ose mesfushor defensiv. Te Barcelona, trajneri Hansi Flick e ka përdorur në këto role. Kjo i ka mundësuar Flickut të ndryshojë organizimin e repartit mbrojtës pa pasur gjithmonë nevojë të bëjë zëvendësime.
Gjatë sezonit 2025/26, Garcia regjistroi 3 953 minuta në ndeshje zyrtare, duke u bërë futbollisti i fushës me më shumë minuta në skuadrën katalanase.
Garcia ka kontratë me Barcelonën deri në qershor të vitit 2031. Kjo e vendos klubin në pozitë të favorshme negociuese nëse interesimi i PSG-së shndërrohet në ofertë zyrtare.