Një punëtor 54-vjeçar ka humbur jetën si pasojë e një aksidenti në punë gjatë procesit të rindërtimit të stadiumit Spotify Camp Nou. Incidenti ndodhi të premten, ndërsa viktima po punonte mbi një platformë të ngritur për shërbime lyerjeje.
Policia katalanase, Mossos d’Esquadra, mbërriti në vendngjarje rreth orës 15:30, pas njoftimit për ngjarjen. Pavarësisht ndërhyrjes së ekipeve të urgjencës, për punëtorin nuk u bë e mundur shpëtimi i jetës. Autoritetet kanë nisur hetimet për zbardhjen e dinamikës, ndërsa për rastin janë vënë në dijeni organet gjyqësore dhe Departamenti i Punës dhe Biznesit i Katalunjës.
Ky është incidenti i parë me pasoja fatale që prej nisjes së projektit të transformimit të stadiumit në qershor 2023. Projekti është përqendruar në ndërtimin e tribunës së tretë dhe unazës së kompresimit, e cila do të mbajë çatinë e re. Deri në këto momente, klubi i Barcelonës nuk ka publikuar ende një reagim zyrtar lidhur me aksidentin.
Përditësime
FC Barcelona ka reaguar zyrtarisht lidhur me vdekjen tragjike të një punëtori gjatë punimeve në stadiumin Camp Nou. Presidenti Joan Laporta u shprehu ngushëllimet e tij familjarëve, ndërsa klubi u zotua për ofrimin e mbështetjes së plotë për familjen dhe kolegët e të ndjerit në këtë moment të vështirë.