Një punëtor 46-vjeçar me origjinë shqiptare ka humbur jetën gjatë punës në një kantier ndërtimi në zonën e Shpatit të Janinës.
Viktima, baba i dy fëmijëve, ndodhej brenda një gërmimi kur një masë dheu u shemb papritur dhe e zuri poshtë. Ngjarja ndodhi gjatë punimeve për ndërtimin e rrjetit të ujërave të zeza.
Në vendngjarje mbërritën menjëherë ekipet e shpëtimit dhe një ambulancë e EKAB. Mjekët kryen manovra reanimimi me CPR, por nuk arritën ta rikthenin në jetë.
Policia arrestoi përgjegjësin e kantierit të ndërtimit. Autoritetet greke kanë nisur hetime për të zbardhur rrethanat e aksidentit.
Në vendngjarje shkoi edhe një ekip i Inspektoratit të Punës në Janinë, i cili po heton kushtet e sigurisë dhe përgjegjësitë përkatëse.