Qendrat Amerikane për Kontrollin dhe Parandalimin e Sëmundjeve (CDC) kanë bërë të ditur se një shtetas amerikan, i angazhuar në një mision humanitar në Republikën Demokratike të Kongos, është infektuar me variantin Bundibugyo të virusit Ebola. Institucioni ka njoftuar se po punohet në bashkërendim me organizatën ku ai shërbente, agjenci të tjera federale dhe partnerët në terren për të identifikuar personat që mund të kenë pasur kontakte me rrezik dhe për të frenuar përhapjen e virusit.
Ndonëse nuk janë dhënë hollësi për identitetin apo gjendjen shëndetësore të pacientit, autoritetet theksojnë se në Shtetet e Bashkuara nuk ka raste të konfirmuara dhe rreziku për popullsinë amerikane mbetet i ulët. Shpërthimi aktual është i përqendruar kryesisht në zona të izoluara të Republikës Demokratike të Kongos dhe të Ugandës fqinje.
Të dhënat zyrtare tregojnë se numri i përgjithshëm i të prekurve nga ky shpërthim ka arritur në 1.830 raste, ndërsa 648 persona kanë ndërruar jetë si pasojë e sëmundjes.
Kjo nuk është hera e parë që një shtetas amerikan preket nga ky virus gjatë shërbimit në këtë rajon. Në muajin maj, mjeku misionar Dr. Peter Stafford u infektua dhe u shërua pas një trajtimi në Berlin. Gjithashtu, muajin e kaluar u raportua rasti i parë i Ebolës jashtë Afrikës gjatë këtij shpërthimi, ku një punonjës humanitar doli pozitiv në Francë pas kthimit nga një mision në Republikën Demokratike të Kongos. Këto ngjarje kanë rritur vëmendjen mbi protokollet e monitorimit për udhëtarët që vijnë nga zonat e prekura.