Presidenti i Federatës Ruse, Vladimir Putin, u shpreh të hënën gjatë një fjalimi përpara qindra të diplomuarve të akademisë ushtarake në Moskë, se aleanca e NATO-s dhe shtetet perëndimore po përgatiten për luftë kundër Rusisë. Sipas tij, ndërsa deri më tani mbështetja e aleatëve ndaj Ukrainës ka qenë e kufizuar, tashmë po diskutohet hapur për rritjen e shpenzimeve ushtarake si pjesë e këtyre përgatitjeve.
Putin hodhi poshtë pretendimet e vendeve perëndimore lidhur me një kërcënim të supozuar ushtarak nga ana e Rusisë, duke i cilësuar ato si të pavërteta. Ai nënvizoi se Rusia mbetet e gatshme për të reaguar në mënyrë operative dhe të përshtatshme ndaj çdo lloj kërcënimi.
Aktualisht, rreth 40% e buxhetit rus orientohet drejt shpenzimeve të mbrojtjes, sigurisë dhe financimit të operacioneve ushtarake në Ukrainë, që filluan në shkurt të vitit 2022. Ky fjalim vjen në një kohë kur vendet anëtare të Bashkimit Evropian dhe NATO-s kanë shtuar ndihmën ndaj Kievit dhe kanë rritur shpenzimet e mbrojtjes, për shkak të shqetësimeve në rritje rreth zgjatjes së konfliktit dhe mundësisë së një përplasjeje më të gjerë.