Qeveria në detyrë e Republikës së Kosovës, në mbledhjen e saj të 27-të të zhvilluar në formë elektronike, ka miratuar ndarjen e mjeteve buxhetore për transmetuesin publik. Shuma e alokuar për RTK-në është 2,240,000 euro.
Ky vendim synon të sigurojë financimin për funksionimin e rregullt të institucionit në përmbushje të misionit të tij ligjor. Ky veprim vjen në një periudhë kur raportohet se punonjësit e RTK-së nuk kanë marrë ende pagat për muajin qershor, ndërsa kanë paralajmëruar protesta për datën 13 korrik.
Krahas këtij vendimi, Qeveria ka miratuar kërkesën e Agjencisë Kosovare të Privatizimit (AKP) për kthimin e fondeve në vlerë prej 48,216.57 eurove. Këto mjete, të cilat ishin transferuar më herët në Buxhetin e Republikës së Kosovës, do t'i kthehen Ndërmarrjes Shoqërore NSH “Magjistrala”, në përputhje me procedurat e kërkuara nga AKP.