Qeveria e Portugalisë ka reaguar lidhur me vrasjen e shtetasit 20-vjeçar, Luis Miguel Varela Mendes, i cili humbi jetën në orët e para të mëngjesit të së martës në Ksamil. Viktima dyshohet se ka gjetur vdekjen pas një konflikti fizik që degradoi në përdorimin e mjeteve prerëse.
Raquel Trindade, nga zyra e Ministrit të Punëve të Jashtme të Portugalisë, deklaroi për stacionin radiofonik Renascença se institucionet portugeze po e monitorojnë ngjarjen nëpërmjet ambasadës në Romë dhe konsullatës së nderit në Tiranë. Ajo theksoi se, për momentin, qeveria portugeze nuk ka informacion zyrtar mbi rrethanat e vdekjes apo mbi hetimet që po zhvillohen nga autoritetet shqiptare.
Sipas zyrtares, informacioni që zotëron aktualisht qeveria portugeze vjen vetëm nga raportimet e medias vendase. Ajo siguroi se Ministria e Punëve të Jashtme do të vazhdojë komunikimin me autoritetet lokale dhe familjarët e viktimës për të zbardhur ngjarjen.
Ndërkohë, sipas informacioneve të publikuara në shtypin shqiptar, policia ka kryer 11 arrestime në lidhje me këtë vrasje. I dyshuari kryesor për goditjen me thikë është një 29-vjeçar, i cili rezulton me precedentë penalë në Mbretërinë e Bashkuar për vepra të lidhura me trafikun e drogës, mbajtjen e armëve dhe shkelje të rregullave të qarkullimit rrugor.
Përditësime
Grupi hetimor identifikoi Sokrat Vatën, 29 vjeç, si autorin e dyshuar të vrasjes. Vata dëshmoi para hetuesve se konflikti lindi mes turistëve si pasojë e konsumit të alkoolit. Ai deklaroi para autoriteteve se thika e përdorur në ngjarje i përkiste viktimës dhe jo atij.