Qeveria do të shqyrtojë më 28 tetor projektbuxhetin për vitin 2027, i cili parashikohet të ketë vlerë prej 10 miliardë eurosh. Më pas, ministri i Financave, Petrit Mala, do ta paraqesë dokumentin në Konferencën e Kryetarëve të Kuvendit, përpara diskutimeve në komisionet parlamentare.
Një nga elementet e projektbuxhetit është kompensimi për bizneset që kanë pësuar dëme gjatë protestave të zhvilluara në kryeqytet gjatë 15 ditëve të fundit. Mekanizmi i dëmshpërblimit pritet të përfshihet në buxhetin e vitit 2027, në kuadër të masave të propozuara nga kryeministri Edi Rama.
Pas paraqitjes së projektbuxhetit në Konferencën e Kryetarëve, do të përcaktohet kalendari i punës së Kuvendit. Më pas, komisionet parlamentare do të nisin shqyrtimin e hollësishëm të zërave buxhetorë.
Sa i përket opozitës, Partia Demokratike pritet të vijojë bojkotin e pjesshëm të punimeve parlamentare. Sipas raportimit të RTSH-së, demokratët kanë paralajmëruar se nuk do të bëhen pjesë e normalitetit parlamentar. Ata kërkojnë dorëheqjen e kryeministrit Edi Rama, krijimin e një qeverie tranzitore dhe zhvillimin e zgjedhjeve të parakohshme.
Mbetet për t’u parë nëse PD-ja do të marrë pjesë në diskutimet për buxhetin në Konferencën e Kryetarëve dhe në çfarë forme do të shprehet për paketën fiskale që shoqëron projektbuxhetin.