Kryeministri Edi Rama ka reaguar ndaj akuzave të shumta që qarkullojnë në hapësirën digjitale, duke i cilësuar ato si pjesë e një realiteti të fabrikuar nga algoritmet e rrjeteve sociale. Gjatë mbledhjes së grupit parlamentar të Partisë Socialiste, ai theksoi se përsëritja e vazhdueshme e akuzave pa baza faktike ka krijuar perceptime të rreme në opinionin publik.
Sipas Ramës, pretendimet se ai ka qenë në Aruba, se është përdorues i lëndëve narkotike, apo akuzat për jetën e tij familjare dhe përfitime të paligjshme, janë shndërruar në "të vërteta" nëpërmjet procesit të riciklimit të vazhdueshëm në internet. Ai u shpreh se në këtë epokë, faktet shpesh shpërfillen në favor të narrativave që prodhohen nga algoritmet.
"Aruba është bërë e vërtetë, është nxjerrë në këtë fushën e algoritmit, është ricikluar në pafundësi. Siç është bërë e vërtetë që unë jam konsumator kokaine apo që kam akuzuar tim atë për marrëdhënie me time shoqe dhe për atësinë e djalit tim", deklaroi kreu i qeverisë.
Kryeministri vuri në dukje se reagimi ndaj këtyre akuzave është i vështirë, pasi procesi i riciklimit të informacioneve e bën gënjeshtrën të perceptohet si absolute. "Jemi në një laborator ku në kohë reale algoritmi, viraliteti, simbolika dhe gënjeshtra prodhojnë një realitet paralel që është bërë e vërteta. Faktet janë përpjekje të dëshpëruara për të mohuar të vërtetën", përfundoi ai.