Kryeministri Edi Rama deklaroi në Asamblenë e Partisë Socialiste në Njësinë 12 se qeveria është e vetme në betejën për integrimin e Shqipërisë në BE. Ai akuzoi opozitën se ngatërrojnë rivalitetin me PS-në me interesin kombëtar dhe të mirën e vendit.
Sipas Ramës, opozita vepron kundër interesit kombëtar në këtë proces dhe e cilësoi atë si "të verbër".
Rama shpjegoi mekanizmin e vendimmarrjes në BE: "Mbyllja e negociatave me BE është të mbyllësh hesapet me BE. Hapi i parë është Brukseli, të gjitha zyrat, nëpunësit që merren me reformat, ndjekin masat e veprimet që ndodhin dhe bëjnë raportin për katin e dytë. Ata raportojnë vetëm si ka ecur puna apo a janë bërë detyrat dhe më pas në kat të dytë janë vendet anëtare. Janë 27 vende që ulen për të marrë vendim dhe mënyra se si funksionon është konsensus. Mjafton që një të thotë nuk duam, vendimi nuk merret. Çdo vendim i BE merret me konsensus."
Ai theksoi se të gjitha vendet anëtare thonë se duan ta marrin Shqipërinë në BE, por qeveria është shumica e vetme në këtë betejë. "Na duhet të kuptojmë se jemi vetëm në këtë betejë, kemi më të mëdhenj, jemi shumica por vetëm. Se të tjerët janë kundër nesh dhe janë kaq të verbër saqë ngatërrojnë kundërshtinë me ne me interesin kombëtar dhe të mirën e përbashkët të vendit, e të fëmijëve tanë e të atyre që të shfrytëzojmë këtë moment dhe të hyjmë në BE", u shpreh Rama.