Rama akuzon PD-në për dhunë në protesta dhe rekrutim mercenarësh

Edi Rama, kryeministër i Shqipërisë, në fillim të podcast-it të tij Flasim komentoi protestën e fundit të Partisë Demokratike të zhvilluar më 10 shkurt, duke hedhur akuza të rënda ndaj opozitës për organizimin e dhunës.

Rama u shpreh se kishte kaluar kohë të gjatë pa komentuar protesta të opozitës, por reagoi pas përshkallëzimit të dhunës dy javë më parë. Sipas tij, në Europë ekzistojnë grupe të ndryshme protestuesish, si anarkistë, ekstremistë, studentë apo tifozë huliganë, por PD është e vetmja parti parlamentare që ka në programin e saj ushtrimin e dhunës, shkatërrimin e pronës dhe sulmet ndaj institucioneve. Ai e krahasoi këtë me parti famëkëqija në Gjermani dhe Itali, të cilat i paraprinë epokës së fashizmit dhe nazizmit.

Kryeministri akuzoi udhëheqjen e PD-së se mobilizon grupe paramilitare, të cilat deri dje ishin çeta të liderit shpirtëror, ndërsa tani janë mercenarë të rekrutuar me lekë nga rrugaçët e lagjeve. Këta, sipas Ramës, maskohen, presin sinjalin dhe hedhin molotovë ose bomba artizanale për të shmangur identifikimin nga kamerat, duke plagosur punonjës policie.

Ai cilësoi protestat si jashtëderdhje në rrugë të një plaku të lajthitur dhe PD-në si forcë pa mision, që shërben vetëm për të shkarkuar rropullinë. Mercenarët u shfaqën sërish në protestën e fundit dhe shkaktuan më shumë dëm duke hedhur bomba artizanale të përgatitura nga udhëheqja e opozitës.

Vizita në SHBA

Në të njëjtin podcast, Rama njoftoi se ka marrë ftesë nga Presidenti Donald Trump për një vizitë në Uashington këtë javë, ku do marrë pjesë në themelimin e Bordit të Paqes për Gazën. Shqipëria, sipas tij, është shtet themelues dhe kontribuon me dinjitetin e saj, pa nevojë për fonde financiare.