Kryeministri Edi Rama mori pjesë të enjten në edicionin e dytë të MatchMaker Albania, ku u drejtua investitorëve të huaj.
Në stendën “Takohu me qeverinë”, ai i ftoi të provojnë rakinë, duke thënë se kjo do t’i bëjë Shqipërinë të duket më e mirë dhe do t’i sjellë në qejf, që të mos vuajnë artificialisht për problemet e korrupsionit dhe krimit të organizuar. Deklarata e tij e plotë ishte: “Sot në stendën ‘takohu me qeverinë’ nuk do të gjeni vetëm raki, por do të gjeni pak raki, edhe pse nuk është më e nevojshme për t’ju dhënë entuziazëm kur vini në Shqipëri, provojeni, do t’ju bëjë që Shqipëria t’ju duket edhe më e mirë, por efekti më i madh apo më i shkëlqyer i saj është që do t’i sjellë të gjithë në qejf e të mos vuajnë artificialisht për këtë problemin tonë, korrupsionin dhe krimin e organizuar”.
Rama falënderoi investitorët gjermanë dhe njoftoi se rrjeti i supermarketeve LIDL po punon me qeverinë për të hapur mjedisin e tyre të parë në Shqipëri. Ai u shpreh: “Njerëzit e LIDL që janë këtu, po punojnë me ne dhe shpejt do të çelin mjedisin e tyre të parë, objektin e tyre të parë dhe ashtu siç më thotë dikush, kur vijnë gjermanët, vërtet je në një nivel tjetër”.
Eventi synon të lidhë investitorët e huaj me qeverinë dhe bizneset shqiptare.