Gjatë Samitit të IV të Diasporës Shqiptare, të mbajtur në Tiranë më 14 prill, kryeministri Edi Rama mirëpriti në skenë ish-kryetarin e Bashkisë së New York-ut, Eric Adams.
Edi Rama i dorëzoi Adamsit një plis, që ky i fundit e vendosi në kokë, si dhe pasaportën dhe kartën e identitetit shqiptare. Kreu i qeverisë bëri një batutë: «Kjo është bota kur kthehet përmbys. Meqenëse shqiptarët e kanë si mënyrë për të thënë ‘se e kam ditur këtë punë’, ta çojë dorën se kujt i ka shkuar mendja që kryetari i Bashkisë së New York-ut do të bëhet qytetar i Tiranës dhe shtetas i Shqipërisë. Askujt s’ja priste mendja, por kjo ditë erdhi».
Rama shtoi se plisi në New York është bosh, ndërsa në Shqipëri është plot dhe sa më shumë ka, aq më shumë merr. Ai premtoi se së shpejti do ta mësojnë Adamsin shqip.
Në fjalën e tij, Eric Adams vlerësoi potencialin e diasporës shqiptare: «Mua nuk më duheshin videot për ta njohur historinë e Shqipërisë. Kur ecja rrugëve të New York-ut, e shikoja shpirtin dhe energjinë e diasporës shqiptare. Ju mund ta keni lënë tokën, por toka nuk e la kurrë zemrën tuaj. Unë e dua Amerikën, por sot, falë kryeministrit Rama, unë jam shqiptar».
Ish-kryetari i Bashkisë së New York-ut, Eric Adams, mori shtetësinë shqiptare më 10 prill. Vendimi u publikua në Fletoren Zyrtare dhe u nënshkrua nga Presidenti i Republikës, Bajram Begaj, pas një kërkese të vetë Adamsit. Gjatë detyrës së tij në New York, Adams ka shprehur në disa raste vlerësim për Shqipërinë dhe komunitetin shqiptar.
Përditësime
- Edi Rama shpjegoi në rrjetet sociale kërkesën e Eric Adams-it për pasaportë shqiptare: premtim për një vizitë para mbylljes së mandatit dhe Tirana si "Nju Jorku i vogël tërheqës".
- Eric Adams u regjistrua si banor i Tiranës (Top Channel).