Kryeministri Edi Rama deklaroi në podcastin e tij "Flasim" se qeveria ka hyrë nga 1 janari i këtij viti në një fazë të re të rritjes së pagave, për rritje reale të të ardhurave dhe mbrojtje të fuqisë blerëse. Paga minimale në shkallë vendi ka arritur 500 euro, ndërsa paga mesatare është rritur rreth 10%, me ritëm të qëndrueshëm si në sektorin publik, ashtu edhe në privat.
Qeveria ka vendosur të indeksojë pagat në sektorin publik çdo dy vite, për të korrigjuar impaktin e inflacionit mbi pagat e kategorive si mësuesit, mjekët, infermierët, punonjësit e policisë, ushtarakët dhe administratën. Ky mekanizëm zbatohet për herë të parë dhe shoqërohet me mekanizma shtesë për grupe të caktuara.
Vëmendje e veçantë i është kushtuar sistemit shëndetësor. Nga muaji qershor, pagat do të rriten në disa shërbime kritike. Mjekët e urgjencës do të trajtohen në të njëjtin nivel me të tjerët për rojet, që përbëjnë ngarkesë shtesë. Shtesat konkrete arrijnë 18 mijë lekë në muaj për mjekët dhe 12 mijë lekë për infermierët dhe teknikët, së bashku me pagesa më të larta për turnet dhe sistem rivlerësimi për përvojën e punës.