Kryeministri Edi Rama, në një intervistë për emisionin “Shqipëria live” në Top Channel, ka komentuar zhvillimet lidhur me investimin turistik në Zvërnec dhe hetimet e Prokurorisë së Posaçme (SPAK) për tjetërsimin e pronave. Rama sqaroi se proceset hetimore që përfshijnë shitësit e tokës, siç është rasti i Artur Shehut, janë rrugë paralele që nuk ndikojnë mbi statusin e pronësisë, e cila tashmë u përket blerësve me tituj të rregullt në Kadastër.
Sipas kreut të qeverisë, nga pikëpamja ligjore investimi nuk rrezikon asgjë. Në rast se palët që pretendojnë pronësinë vërtetojnë të drejtën e tyre në gjykatë, ata do të përfitojnë fondet nga llogaritë e ngrira ku janë depozituar paratë e transaksionit. Këto llogari, sipas Ramës, janë një garanci që shitësit nën hetim nuk mund t'i aksesonin pa përfunduar proceset ligjore.
Rama theksoi se mbështetja për këtë projekt në Vlorë mbetet e lartë, duke e cilësuar kundërshtinë e shfaqur si një qasje të kufizuar. Lidhur me procedurat administrative, kryeministri bëri me dije se projekti ndodhet në fazën e lejes së zhvillimit, që shërben si aprovim paraprak i konceptit, ndërsa theksoi se nuk është lëshuar asnjë leje ndërtimi.
Ai mbrojti vlefshmërinë e transaksioneve të kryera, duke u shprehur se blerësit kanë vepruar mbi bazën e certifikatave zyrtare të pronësisë. Kryeministri vlerësoi se refuzimi i një investimi të tillë, me vlerë 4 miliardë euro, do të ishte në dëm të ekonomisë së vendit, e cila llogaritet në nivelin e 27 miliardë eurove.